◆ 许德华

道路两旁侪是连成片个草莓大棚，让青龙公路显得细巧。公交白徐线到“纪鹤公路青龙公路”站下车，沿青龙公路向南步行1公里左右，就能看到青龙寺个指示牌，拐进小路继续步行几百米，就能看到灰扑扑个青龙塔了。走近看，塔下围墙个门锁关得紧腾腾。旁边个青龙寺，山门两侧个墙面被刷成嫩黄色，四周围静笃笃。

现在个青浦白鹤镇，唐宋辰光叫青龙镇，搿辰光伊是上海最大个对外贸易港口，烟火万家、市面闹猛，有“小杭州”个美称。

史书里写，先有青龙寺，后有青龙塔。买门票进寺，人家讲塔只好看外观。我搭帮我开门个一位老伯伯聊起青龙塔个历史，伊看我真心想看青龙塔，就答应单独开门带我去看，我连声感谢。

搿座青龙寺，最早是唐朝天宝年间造个，有1200多年个历史了。到了唐长庆元年（公元821年），青龙塔也造起来了。

走进塔里，抬头仰望，伊一层层收进去个格局真个有看头！每层侪以转45度角个样子叠辣下一层上头，塔身是八角形个。每层四面开门，地面个四扇门，可以随便进出。现在看到个青龙塔，是明朝定个型，能证明塔建造年代个关键零件，侪收辣青浦博物馆里。为了安全和文物保护，青龙塔现在被围墙拦牢了。

带我看塔个老伯伯讲，老电影《夜半歌声》曾经来此地取过景。塔个围墙外头有条河浜，上面搭了一座小桥，六七步路就跨过去了。老伯伯讲：“侬晓得口伐？几百年前，搿条河浜就像今朝个黄浦江，热闹得勿得了啊……”

元朝个治水专家任仁发，世世代代住辣青龙镇，伊祖孙三代出钱修青龙塔，一修就修了44年。现在延长西路上个元代水闸遗址，就是伊当年牵头做个水利工程。1962年，青龙寺塔被定为上海市文物保护单位，成了上海个城市文脉，也是现在“建筑可阅读”个好去处，更是阿拉上海人一日游个好白相地方。